IRI მორიგი კვლევის შედეგებს აქვეყნებს
25.07.12 15:42
საერთაშორისო რესპუბლიკური ინსტიტუტი ახალი კვლევის შედეგებს აქვეყნებს. ივლისის პირველ ნახევარში ჩატარებული გამოკითხვის შედეგები ასახავს მოსახლეობის დამოკიდებულებას პოლიტიკური პროცესების მიმართ, მათ განწყობას არჩევნების წინ და აგრეთვე პოლიტიკოსთა რეიტინგებს.
კვლევის თანახმად, პოლიტიკურ ლიდერებს შორის საქართველოს პრეზიდენტი დიდი პოპულარობით სარგებლობს. გამოკითხულთა 73% მის საქმიანობად დადებითად აფასებს.
შეკითხვაზე: "ხვალ რომ საპარლამენტო არჩევნები იყოს, ვის მისცემდით ხმას?" – გამოკითხულთა 43% მხარს უჭერს ერთიან ნაციონალურ მოძრაობას და მიხეილ სააკაშვილს; ქართული ოცნება 24%–მა აირჩია; ქრისტიან–დემოკრატები კი 7%–მა. გამოკითხულთა 5%–მა არც ერთ პარტიას არ დაუჭირა მხარი, 19%–ს პასუხი არ აქვს.
რაც შეეხება საპრეზიდენტო არჩევნებს, აქ შედეგები ასეთია: ნაციონალური მოძრაობის კანდიდატი – 37%; ბიძინა ივანიშვილი კი 24%.
საერთაშორისო რესპუბლიკური კვლევა სხვადასხვა ორგანიზაციისა და უწყების მიმართ მოსახლეობის დამოკიდებულებასაც ასახავს. სახელმწიფო ინსტიტუციებს შორის კი ყველაზე დიდი ნდობით გამოკითხულებში ქართული არმია სარგებლობს. შემდეგ კი მოდის პოლიცია, პრეზიდენტის ადმინისტრაცია, მთავრობა და საქართველოს პარლამენტი.
როგორი დამოკიდებულება აქვს მოსახლეობას საქართველოში მიმდინარე პროცესების მიმართ? კვლევის მონაწილეთა 54%–ს მიაჩნია, რომ ქვეყანაში მოვლენები სწორი მიმართულებით ვითარდება.
რაც შეეხება იმ პრობლემებს, რომელთა წინაშეც საქართველო დგას. გამოკითხულთა უმეტესობა პირველ რიგში უმუშევრობას ასახელებს, რასაც მოსდევს დაკარგული ტერიტორიების დაბრუნება, ეკონომიკის გაძლიერება, სოციალური პრობლემები და სიღარიბე.
|
