ვანო მერაბიშვილი გულ-სისხლძარღვთა კლინიკაში მივიდა
27.07.12 16:11
საქართველოს პრემიერ-მინისტრი ჯანდაცვის უწყების ხელმძღვანლთან ერთად, დღეს თბილისის გულისა და სისხლძარღვთა კლინიკაში მივიდა. კლინიკაში დღეს წარმატებით დასრულდა გულიდან სიმსივნის ამოკვეთის ურთულესი ოპერაცია. პრემიერი იმ სამედიცინო პერსონალს შეხვდა, რომელიც ოპერაციაში მონაწილეობდა.
რთული ქირურგიული ოპერაციის დეტალები ვანო მერაბიშვილმა უშუალოდ კლინიკის მთავარი ექიმისგან მოისმინა. პრემიერი ოპერაციის ღირებულებით დაინტერესდა და ხაზი გაუსვა, რომ მთავრობის ამოცანაა ყველაზე გაჭირვებულ ადამიანსაც კი ჰქონდეს საშუალება მსგავსი ოპერაცია გაიკეთოს იმ სადაზღვევო პოლისით, რომელიც ხელმისაწვდომი ჯანდაცვის უზრუნველყოფის სამთავრობო პროგრამის ფარგლებში ურიგდება მოსახლეობას.
ოპერაციის ღირებულება, 9200 ლარი მოცემულ შემთხვევაში სადაზღვევო კომპანიამ დაფარა.
პრემიერმა აღნიშნა, რომ დაზღვეულთა რაოდენობის ზრდის პარალელურად, უნდა გაიზარდოს სამედიცინო პერსონალის ხელფასებიც.
|
