მთავრობის წევრები კახეთში იმყოფებიან
29.07.12 15:37
ჯანდაცვის მინისტრმა და პრეზიდენტის სპეციალურმა წარმომადგენელმა კახეთში სტიქიის მიერ ოჯახებისათვის მიყენებული ზარალის აღწერის მოხალისეთა ჯგუფს კონკრეტული დავალებები მისცეს.
ზურაბ ჭიაბერაშვილი და ლევან ბეჟაშვილი ახალგაზრდებს სოფელ კურდღელაურში შეხვდნენ. აქცენტი უკვე გატარებულ ღონისძიებებსა და სამომავლო გეგმებზე გაკეთდა. ჯანდაცვის მინისტრმა მოხალისეთა ჯგუფს კითხვარებში ყველა დეტალის აღწერა დაავალა. ითქვა, რომ დაზარალებულ 28,000 ოჯახს კომპენსაციები უკვე აგვისტოში დაურიგდებათ. რაც შეეხება სახლების გადახურვას, მინისტრის თქმით, ამ ეტაპზე 4,000 სახლიდან 2, 500-ს უკვე ახალი სახურავი აქვს.
სეტყვის მიერ განადგურებული ვენახების აღდგენის საკითხზე ისაუბრა თელავის რაიონში ჩასულმა პრემიერ-მინისტრმაც. სოფლის მეურნეობის მეცნიერებათა აკადემიის სპეციალისტებთან ერთად, ვანო მერაბიშვილი სოფელ კისისხევში გლეხებს შეხვდა. პრემიერის თხოვნით, აკადემიკოსები ახალი სამთავრობო პროგრამის განხორციელების საქმეში აქტიურად იქნებიან ჩართული. მეცნიერების რეკომენდაციით, მალე დაიწყება სასუქების შეტანა დაზიანებულ ვენახებსა და ბაღებში. სისტემატურად გატარდება მათი აღდგენის სხვა გეგმური ღონისძიებები.
|
