ივანიშვილი ხელისუფლებას უჩივის
01.08.12 14:28
ბიძინა ივანიშვილი ხელისუფლების წინააღმდეგ საერთაშორისო არბიტრაჟში ჩივის. ამის შესახებ `ქართული ოცნების` პრესსპიკერმა დღევანდელ პრესკონფერენციაზე განაცხადა.
მაია ფანჯიკიძის განმარტებით, ბიძინა ივანიშვილის დაცვა საერთაშორისო იურიდიულმა კომპანია `სკადენმა` ითავა. მისივე თქმით, `სკადენმა` ივანიშვილის სახელით მოამზადა იურიდიული დოკუმენტი, რომელიც გადაეგზავნა საქართველოს პრეზიდენტს და იუსტიციის სამინისტროს. მათ მიეცათ ორკვირიანი ვადა იმისთვის, რომ მოხდეს შეთანხმება ბიძინა ივანიშვილისთვის ზარალის ასანაზღაურებლად. წინააღმდეგ შემთხვევაში, საქმეს მსოფლიო ბანკთან არსებული საინვესტიციო დავების განხილვის საერთაშორისო ცენტრში, ვაშინგტონში განიხილავენ.
`ქართულ ოცნებაში` არ აკონკრეტებენ, რა თანხას ითხოვს ივანიშვილი საქართველოს სახელმწიფოსგან, თუმცა ჯერ კიდევ ორი კვირის წინ მისი უცხოელი ადვოკატი აცხადებდა, რომ საუბარია ასობით მილიონ დოლარზე.
|
