ლეიბორისტებმა ცესკოში განაცხადი შეიტანეს
03.08.12 12:03
ლეიბორისტული პარტია საპარლამენტო არჩევნებში მონაწილეობას მიიღებს - შესაბამისი განცხადი პარტიის წარმომადგენლებმა გიორგი გუგავამ და კახა ძაგანიამ დღეს ცენტრალურ საარჩევნო კომისიაში შეიტანეს.
`დღეს ჩვენ შევიტანეთ განაცხადი ცესკოში იმაზე, რომ ლეიბორისტული პარტია საპარლამენტო არჩევნებში მიიღებს მონაწილეობას. არჩევანი დიდი არ არის, ერთ მხარეს დგანან კრიმინალ-ოლიგარქები სააკაშვილ- ივანიშვილის სახით და მეორე მხარეს დგას ეროვნულ-სოციალური ძალა, ლეიბორისტული პარტიისა და შალვა ნათელაშვილის სახით,`- განაცხადა კახა ძაგანიამ.
გიორგი გუგავას განცხადებით კი არჩევნებში ლეიბორისტების დევიზი იქნება `მდიდარს ვართმევთ, ღარიბს ვაძლევთ`.
ლეიბორისტები აჭარის უმაღლესი საბჭოს არჩევნებშიც გეგმავენ მონაწილეობას. დღეს პარტიამ განაცხადი ბათუმშიც წარადგინა. უმაღლესი საარჩევნო კომისიის ოფისში ლეიბორისტული პარტიის აჭარის ორგანიზაციული საბჭოს თავმჯდომარემ დავით რობაქიძემ შეიტანა. რამდენიმე დღეში მაჟორიტარობის კანდიდატთა ვინაობაც უნდა გახდეს ცნობილი.
|
