მერიის შენობასთან სახელმწიფო დროშა დაეშვა
07.08.12 13:46
სახელმწიფო დროშა დაეშვა დღეს მერიის შენობის წინ. ქალაქის მერმა პატივი მიაგო საქართველოს ერთიანობისთვის დაღუპულ გმირთა ხსოვნას.
გიგი უგულავამ გვირგვინით შეამკო გმირთა მემორიალი.
ქალაქის მერთან ერთად, დაღუპულები თბილისის ტრანსპორტის სამსახურის თანამშრომლებმა და სასწრაფო-სამედიცინო ბრიგადის წევრებმა გაიხსენეს.
4 წლის წინ დაიწყო, კრემლის ბრძანებით, ოკუპირებული ტერიტორიებიდან საქართველოს დასაპყრობად სამხედრო ოპერაცია. ოკუპირებულ აფხაზეთსა და ცხინვალის რეგიონში, მოსკოვის ბრძანებით, სამხედრო ძალების კონსოლიდირება რამდენიმე კვირით ადრე მიმდინარეობდა. საქართველოს დასაპყრობად, სრული მძიმე შეიარაღებაც მომზადდა. ომის დაწყების მიზეზად კრემლმა რუს ე.წ. მშვიდობისმყოფელებზე თავდასხმის ინსცენირება გამოიყენა და, რუსეთის მოქალაქეების ინტერესების დაცვის მოტივით, საქართველოს ტერიტორიაზე შემოიჭრა.
მიხედავად ძალთა უთანასწორობისა, ქართული სამხედრო შენაერთების ძალისხმევით, ქართველი ჯარისკაცების თავდადებითა და საერთაშორისო თანამეგობრობის, მეგობარი ქვეყნების ლიდერების მხარდაჭერით, რუსული ინტრვენციის შეჩერება მოხერხდა.
რუსეთს დღემდე ოკუპირებული აქვს საქართველოს ტერიტორიები - აფხაზეთი და ცხინვალის რეგიონი და მათი დამოუკიდებლობის აღიარების მოპოვებას სხვადასხვა ქვეყნისაგან დღემდე უშედეგოდ ცდილობს.
რუსეთ-საქართველოს ომში დაღუპულებს დღეს მთელ საქართველოში იხსენებენ. ომში 188 მშვიდობიანი მოქალაქე, 168 სამხედრო და 16 პოლიციელი დაიღუპა.
|
