სააკაშვილი გორის სამხედრო აკადემიის ჯარისკაცებს შეხვდა
08.08.12 16:27
"რუსეთი ვერასდროს გაიმარჯვებს საქართველოს თავისუფლებაზე", - ამ სიტყვებით მიმართა საქართველოს პრეზიდენტმა გორის სამხედრო აკადემიაში შეკრებილ ჯარისკაცებს და იმ გმირების ოჯახის წევრებს, რომლებიც 2008 წლის აგვისტოში რუსულ აგრესიას წინ აღუდგნენ.
4 წლის წინ სწორედ გორი იყო რუსული ბომბდამშენების მთავარი სამიზნე.
"4 წლის წინ რუსეთს საქართველოს ტერიტორიების ოკუპირების დროს, ჰქონდა მკვეთრად გამოკვეთილი 3-პუნქტიანი გეგმა - დაემხო საქართველოს მთავრობა, მისთვის დაეკარგა გეოპოლიტიკური ფუნქცია და ხელი შეეშალა ერთი მხრივ, ნატოს გაფართოებისთვის და მეორე მხრივ, საქართველოსთვის ალიანსში გაწევრიანებით უსაფრთხოების გრძელვადიანი გარანტიების მიღებისთვის, ასევე ქვეყნის ევროკავშირში ინტეგრაციის პროცესისთვის," - განაცხადა მან.
პრეზიდენტის თქმით, ოკუპანტმა მიზანს ვერც ერთი მიმართულებით ვერ მიაღწია და სწორედ ამიტომ ის გამარჯვებული არ არის.
რაც შეეხება ახალ საფრთხეს, როგორც სააკაშვილი აცხადებს, მრავალი პროვოკაციის და საბოლოოდ, ღია სამხედრო აგრესიის მეთოდების წარუმატებლობის შემდეგ კრემლში საქართველოს დამორჩილების ახალი გეგმები მუშავდება, რომელიც ისევ საბჭოთა ოცნებებს ემყარება და ამ ოცნების ასრულების ახალ გზას კრემლში საქართველოს შიგნიდან გატეხვით ხედავენ.
პრეზიდენტის შეფასებით, დამპყრობლებს კარგად აქვთ შესწავლილი საქართველოს ისტორია და იციან, რომ ყოველთვის მოიძებნება ვინმე ისეთი, ვინც თავისი კეთილდღეობისთვის ქვეყნის ინტერესებს დათმობს. ამჯერად კი ქართველმა ხალხმა გაკვეთილი ისევ საკუთარი ისტორიიდან უნდა მიიღოს.
"ჩვენ კარგად გვახსოვს ფაქტები, როდესაც ამბობდნენ, რომ თუ დათვი გერევა, ბაბაია უნდა დაუძახო. ასევე კარგად გვახსოვს, რომ ამ მეთოდმა არც ერთხელ არ გაამართლა და რამდენჯერაც ბაბაია დავუძახეთ, იმდენჯერ არ დაგვინდეს. საბოლოოდ საქართველომ სახელმწიფოებრიობის შენარჩუნება მოახერხა იმიტომ, რომ არც ერთხელ თავი არ დახარა და ხალხი არ გაჰყვა მათ, ვინც დათმობისკენ მოუწოდებდა. ამჯერადაც ასე მოხდება", - აღნიშნა მან.
|
