ლარნაკას ინციდენტს უეფა გამოიძიებს
10.08.12 11:40
დაპირისპირება სტადიონზე არეულობაში გადაიზარდა. ქართველი ფეხბურთელების თამაშით უკმაყოფილო კვიპროსელმა გულშემატკივარმა ნიქოზიაში მიმდინარე თამაში ჩაშალა და პოლიციას დაუპირისპირდა. გორის "დილის" ფეხბურთელებს სტადიონის დატოვება მოუხდათ. შემთხვევას უეფას საგამოძიებო კომისია იძიებს.
შეხვედრის დასრულებამდე 8 წუთით ადრე, შეხვედრის მთავარი არბიტრის გადაწყვეტილებით, შეხვედრა შეწყდა. კვიპროსელმა გულშემატკივარმა შეხვედრის ჩაშლა გადაწყვიტა. ნაწილი მოედანზე შევარდა, ნაწილმა ტრიბუნებზე ცეცხლი გააჩაღა, ხოლო ზოგიერთმა ტელეტრანსლირებისთვის საჭირო აპარატურა დაამტვრია. არეულობა სტადიონზე 15 წუთზე მეტ ხანს გაგრძელდა. მოგვიანებით დაპირისპირებამ გულშემატკივრებსა და პოლიციას შორის ნიქოზიის ქუჩებში გადაინაცვლა.
ანორთოსისის გულშემატკივარმა მოედანზე შეჭრა მას შემდეგ დაიწყო, რაც ქართველმა ფეხბურთელებმა მოწინააღმდეგის კარში მესამე ბურთი გაიტანეს. თამაშის შეჩერებიდან მალევე "დილის" ფეხბურთელებმა მოედანი დატოვეს. უეფა ლარნაკაში მომხდარ ინციდენტს დეტალურად გამოიძიებს და სავარაუდოდ, კვიპროსის კლუბს დასჯის.
დილა კი აგრძელებს ევროტურნირზე ასპარეზობას, ქართველი ფეხბურთელები უეფას ევროპის ლიგის პლეი ოფში იასპარეზებენ.
ანტონის პაპანდოპულოსის სახელობის სტადიონზე შეკრებილმა მაყურებელმა ორი განსხვავებული ტაიმი იხილა, პირველ 45 წუთში მასპინძლები აქტიურობდნენ, მეორე ტაიმი კი "დილის" სრული სათამაშო და ტერიტორიული უპირატესობით წარიმართა. ანგარიში 54-ე წუთზე მათე ვაწაძემ გახსნა. 78-ე წუთზე ლაშა სალუქვაძემ "დილის" უპირატესობა ორამდე გაზარდა.
მეორე გატანილი გოლის შემდეგ ერთ წუთში "ანორთოსისი" მოედანზე ათი ფეხბურთელით დარჩა, მთავარმა არბიტრმა შოთა გრიგალაშვილის მიმართ უხეში თამაში დაადასტურა და მასპინძელთა კაპიტანი ლაბანი მოედნიდან გააძევა.
გორის "დილა" სამშობლოში გამთენიისას დაბრუნდა. ლარნაკაში დაწყებული ზეიმი გორში ამ წუთებშიც გრძელდება.
|
