ახალ ლაბორატორიას ლუგარის სახელი დაერქვა
12.08.12 18:46
საზოგადოებრივი ჯამრთელობის კვლევითი ცენტრს საქართველოში ამერიკელი სენატორის, რიჩარდ ლუგარის, სახელი მიენიჭა. საზეიმო ცერემონია აეროპორტის მიმდებარე ტერიტორიაზე გაიმართა, სადაც ახალი ამერიკული ინვესტიციით აშენებულ ახალ ლაბორატორია მდებარეობს.
ღონისძიებას, საქართველოს პრეზიდენტთან ერთად, თავად ამერიკელი სენატორიც ესწრებოდა. დელეგაციაში იმყოფებოდა ამერიკის თავდაცვის მდივნის თანამშემწე, ბირთვული და ქიმიურ ბიოლოგიური პროგრამების განხრით, ენდრიუ ვებერიც.
რეგიონისათვის უპრეცედენტო პროექტი ამერიკის მთავრობის ფინანსური მხარდაჭერით შეიქმნა და ეს არის ერთ-ერთი ყველაზე დიდი ინვესტიცია, რომელიც საქართველოში განხორციელდა.
პრეზიდენტმა სიტყვით გამოსვლისას აღნიშნა, რომ ლაბორატორიაში აღიზრდება ახალი თაობა ქართველი მეცნიერებისა. ქვეყნის პირველმა პირმა ამერიკელ სენატორს მადლობა გადაუხადა და აღნიშნა, რომ ის არა მხოლოდ ამერიკელებისთვის არის მნიშვნელოვანი პიროვნება, არამედ საქართველოსთვისაც.
დღეს, სენატორმა და საქართველოს პრეზიდენტმა, სიმბოლურად, ახალი კლაბორატორიის ადმინისტრაციული შენობის მშენებლობასაც ჩაუყარეს საძირკველი.
საზეიმო ცერემონიის შემდეგ, უახლესი ტექნოლოგიებით აღჭურვილი ლაბორატორია საქართველოს პრეზიდენტმა ამერიკელ სენატორს პირადად დაათვალიერებინა. ახალი კომპლექსი არის თანამედროვე სტანდარტების დაწესებულება, რომლის მიზანია, გააძლიეროს და განავითაროს საზოგადოებრივი და ცხოველთა ჯანდაცვა ინფექციურ დაავადებათა აღმოჩენის, ეპიდემიოლოგიური ზედამხედველობისა და კვლევის გზით.
ლაბორატორიას უკვე სტუმრობდა რამდენიმე ქვეყნის დელეგაცია. სინგაპურის წარმომადგენლობამ რიჩარდ ლუგარის სახელობის საზოგადოებრივი ჯანდაცვის ცენტრალურ საცნობარო ლაბორატორიასთან თანმაშრომლობის სურვილი უკვე გამოთქვა.
|
