სენატორი ლუგარი ოპოზიციას შეხვდა
12.08.12 17:45
საქართველოში ვიზიტად მყოფი ამერიკელი სენატორი, რიჩარდ ლუგარი, ქართული ოპოზიციის წარმომადგენლებს შეხვდა.
"თბილისი მერიოტში" ლუგართან შეხვედრაზე, ქრისტიან-დემოკრატები და "ქართული ოცნების" კოალიციის წარმომადგენლები იმყოფებოდნენ.
შეხვედრაზე საარჩევნო გარემო განიხილებოდა. სენატორმა ლუგარმა შშ-ის მხარდაჭერა საქართველოსადმი კიდევ ერთხელ დაადასტურა.
"ამ არჩევნების შედეგად, ჩვენ უნდა დავასრულოთ ერთი პარტიის დომინირება მთელ პარლამენტსა და ოპლიტიკურ სივრცეზე. ეს გესმის ყველას კარგად, ვინც ერკვევა საქართველოს პოლიტიკაში; ეს ესმით კარგად ჩვენს ამერიკელ მხარდამჭერებს, რომლებიც გულშემატკივრობენ საქართველოს დემოკრატიულ მომავალს, გულშემატკივრობენ ერთიან საქართველოს ყველა თაობისთვის და ბატონი ლუგარი სწორედ გახლავთ ის სენატორი, რომელიც, მათ შორის, 2008 წლის ომის პერიოდშიც კი, იყო ჩამოსული საქართველოში ჩვენს მხარდასაჭერად, რისთვისაც ძლიან მადლიერი ვართ," - განაცხადა "ქრისტიან-დემოკრატიული მოძრაობის" თავმჯდომარემ, გიორგი თარგამაძემ.
"მთავარი, რასაც გაუსვა სენატორმა ხაზი არის, რომ განსაკუთრებული ყურადღებით დააკვირდებიან, როგორ დაითვლიან არჩევნების დღეს იმ ხმებს, რომლებიც განაწილდება პოლიტიკურ პარტიებს შორის. მთავარი აქცენტი გადატანილი იქნება, რა თქმა უნდა, წინასაარჩევნო კამპანიის მონიტორინგზე, მაგრამ დიდი აქცენტები იქნება დასმული დათვლაზე. ყველას კარგად ესმის, რომ, დათვლის პროცესში, არავითარ შემთხვევაში, არ უნდა მოხდეს დარღვევები და ქართველი ხალხის გადაწყვეტილება უნდა იყოს სწორად ასახული საარჩევნო კომისიის მიერ. რაც შეეხება სხვა თემებს, ჩვენ ვისაუბრეთ რუსეთის ოკუპაციაზე, თუ რამდენად მნიშვნელოვანია ჩვენი ქვეყნისთვის, რომ აშშ და, განსაკუთრებით, სენატორი ლუგარი უჭერს მხარს საქართველოს ტერიტორიულ მთლიანობას, რუსეთის ჯარების გაყვანას ჩვენი ქვეყნის ტერიტორიიდან," - განაცხადა "ჩვენი საქართველო - თავისუფალი დემოკრატების" თავმჯდომარემ, ირაკლი ალასანიამ.
|
