ოლიმპიური დელეგაცია საქართველოში ბრუნდება
13.08.12 16:56
ზაფხულის 30-ე ოლიმპიადზე ლონდონში საქართველოს დელეგაციამ გამოსვლა 1 ოქროს, 3 ვერცხლის და 3 ბრინჯაოს მედლით დაასრულა. საქართველო ოლიმპიურ თამაშებზე 35 სპორტსმენით იყო წარმოდგენილი, რომლებიც ჩვენი ქვეყნის სახელით სპორტის 21 სხვადასხვა სახეობაში გამოვიდნენ.
ოლიმპიური ჩემპიონი 66 კილოგრამ წონით კატეგორიაში 20 წლის გორელი ძიუდოისტი, ლაშა შავდათუაშვილი გახდა. გარდა ამისა, მან რეკორდის დამყარებაც შეძლო - ის ოლიმპიადების არსებობის ისტორიაში ყველაზე ახალგაზრდა ქართველი სპორტსმენი გახდა, რომელმაც ოლიმპიური ოქროს მედლის მოპოვება მოახერხა.
ვერცხლის მედლები თავისუფალი სტილით მოჭიდავეებმა, ვლადიმერ ხინჩეგაშვილმა და დავით მოძმანაშვილმა, ასევე ბერძნულ-რომაული სტილით მოჭიდავე რევაზ ლაშხმა მოიპოვეს. ბრინჯაოს მედლის მფლობელები კი დავით მარსაგიშვილი, მანუჩარ ცხადაია და გიორგი გოგშელიძე გახდნენ. გოგშელიძემ ოლიმპიადის დასრულებისთანავე, კარიერის დასრულების შესახებაც განაცხადა. საქართველოს ოლიმპიური დელეგაციის წევრები თბილისში დღეს საღამოს დაბრუნდებიან.
|
