ბაგრატის ტაძარზე ახალი ჯვარი აღიმართა
17.08.12 14:36
ბაგრატის ტაძარზე ახალი ჯვარი აღიმართა – ცერემონიას უამრავ მორწმუნესთან ერთად, საქართველოს პრეზიდენტი დაესწრო. ტაძართან მისულ პრეზიდენტს მეუფე კალისტრატე შეხვდა და მას საჩუქრად დავით აღმაშენებლის ხატი გადასცა. მიხეილ სააკაშვილმა შეკრებილ მოსახლეობას მიმართა და ბაგრატის ტაძრის აღდგენის მნიშვნელობაზე ისაუბრა.
`ეს ტაძარი დაანგრია რუსეთის არტილერიამ, სხვა ტაძრებში მათ გადაგვიღებეს ჩვენი ფრესკები საღეავით, არის დრო ქვების გაბნევის, არის დრო ქვების შეგროვების და ახლა ჩვენ გვაქვს დრო საქართველოს აღმშენებლობის. ჩვენ ყველაფერი უნდა აღვადგინოთ, ყველაფერი უნდა ავაშენოთ და ეს არ არის რომელიმე პოლიტიკური პარტიის კუთვნილება. ეს ეკუთვნის სრულიად საქართველოს, პოლიტიკოსს და არა პოლიტიკოსს, ეს არის ერთიანი საქართველოს სიმბოლო,` განაცხადა პრეზიდენტმა.
მიმართვის შემდეგ, პრეზიდენტი გუმბათზე ავიდა და ჯვრის დამონტაჟებაში უშუალოდ მიიღო მონაწილეობა. ტაძრიდან ჩამოსულ მიხეილ სააკაშვილს რუსი ტურისტები შეხვდნენ და თავიანთი შთაბეჭდილებები გაუზიარეს.
|
