თბილისის მერი სოციალურად დაუცველ ოჯახს ესტუმრა
08.06.12 14:52
სახელმწიფო დაზღვევის ახალ პროექტებზე სასაუბროდ თბილისის მერი სოციალურად დაუცველ ერთ-ერთ ოჯახს ესტუმრა. გიგი უგულავა ნორიოს ქუჩაზე მცხოვრებ ნიკოლაიშვილების ოჯახში ექიმთან ერთად მივიდა.
მედიკოსმა 4 წლის ავთანდილ ნიკოლაიშვილი გასინჯა, რომელსაც ხშირად აქვს ჯანმრთელობასთან დაკავშირებული პრობლემები. ოჯახის ექიმის მომსახურებით ნიკოლაიშვილები უსახსრობის გამო ვერ სარგებლობდნენ. ოჯახს სოციალურად დაუცველის სტატუსი სუბსიდიების სააგენტომ ივნისში მიანიჭა და შესაბამისად, ისინი სოციალური პაკეტის ფარგლებში ყველა შეღავათით ისარგებლებენ, მათ შორის, დაზღვევითაც.
თბილისის მერიის მიერ დედაქალაქში 300 ათასი სხვადასხვა კატეგორიის ადამიანია დაზღვეული, მათ შორის, თითქმის 60 ათასი სოციალურად დაუცველია. 2012 წლის პირველი სექტემბრიდან ძალაში შედის სახელმწიფო დაზღვევის ახალი პროექტი, რომლის მიხედვით დაზღვევა ექნება ყველა პენსიონერს და 0-დან 5 წლის ჩათვლით ასაკის ბავშვს. რაც იმას ნიშნავს, რომ თბილისში სექტემბრიდან ნახევარ მილიონამდე ადამიანი იქნება დაზღვეული.
|
